თანამედროვე საზოგადოებაში კომპიუტერული სისტემების გამოყენებათა ზრდის გამო კიბერსივრცის უსაფრთხოება ერთ-ერთ უმნიშვნელოვანეს პრობლემად იქცა. უსაფრთხოების ნორმების დაცვაში დაშვებული უყურადღებობა და შეცდომები მოწინააღმდეგეს საშუალებას აძლევს ხელთ იგდოს ღირებული პირადი ინფორმაცია, ფინანსური მონაცემები, ეკონომიკური და სამხედრო საიდუმლოებანი და გავლენა მოახდინოს პოლიტიკურ გადაწყვეტილებებზე.

კიბერუსაფრთხოების ამოცანაა ციფრული რესურსების, სისტემების, ქსელების, მონაცემების დაცვა მათზე უნებართვო წვდომისგან. ინვესტიციები ამ დარგში, მისი უაღრესად დიდი მნიშვნელობის გამო, განუხრელად იზრდება. გარტნერის პროგნოზით, ინფორმაციის უსაფრთხოების მსოფლიო ბაზრის ღირებულება 2022 წლისთვის 170.4 მილიარდ აშშ დოლარს მიაღწევს.

კრიპტოგრაფია და კრიპტოგრაფიული პროტოკოლები კიბერუსაფრთხოების ქვაკუთხედია. ეს გახლავთ ტექნიკა, რომელიც საშუალებას გვაძლევს ინფორმაციის მიმოცვლა განვახორციელოთ უსაფრთხოდ. დამტკიცებულია, რომ დღეისათვის არსებული კრიპტოგრაფიული პროტოკოლები აღარ იქნება უსაფრთხო კვანტური კომპიუტერის ეპოქაში, ამიტომ აქტუალურია პოსტ-კვანტური კრიპტო-სისტემების კვლევა.

წარმოდგენილი სამეცნიერო პროექტი ეხებოდა პოსტ-კვანტური კრიპტოგრაფიული სქემების ფორმალურ ანალიზს. პროექტის ფარგლებში განხორციელდა NTRU-ზე დაფუძნებული კრიპტოგრაფიული პროტოკოლების მოდიფიკაცია და ანალიზი ფორმალიზმში, რომელიც მიღებულია ლოგიკური პროგრამირების და პირობითი გადაწერის წესების კომბინაციით. მიღებული შედეგები როგორც თეორიული, ისე პრაქტიკული ხასიათისაა. პროექტის ფარგლებში მიღებული შედეგები განავრცობენ არსებულს და ქმნიან ახალ ტექნოლოგიებს კრიპტოსისტემების ფორმალური ანალიზის მიამრთულებით. პროექტში მიღებული შედეგები მნიშვნელოვანია, როგორც მეცნიერებისათვის, ასევე ინსუდტრიისათვის. კერძოდ, მიღებული შედეგების გამოყენება შესაძლებელია ისეთ დარგებში, როგორიცაა კიბერ უსაფრთხოება, მონაცემთა ანალიზი და უსაფრთხოება, დეკლარაციული პროგრამირება და ფორმალური ანალიზი.

პროექტში მონაწილე პერსონალი:

• Mikheil Rukhaia (პროექტის ხელმძღვანელი)

• Besik Dundua (ძირითადი პერსონალი)

• Lali Tibua (ძირითადი პერსონალი)

• Lia Kurtanidze (ძირითადი პერსონალი)

• Lela Mirtskhulava (ძირითადი პერსონალი)